Kad počneš dan, ki je još k tomu i subota, z jutarnju kafu na balkonu čini ti se da nikomu na svitu ni lipše nego tebi i da se nimaš pravo žalit ni kukat. Zapravo i je tako. Od kukanja i tako niš. Bolje je otvorit oči i gjedat lipote kolo sebe. Tići, ki su jušto dobili mladih, veselo se pogovaraju, mat skakuće po gurli i napovida neš ocu ki njoj živo i veselo odgovara nigdi zi smokve. Moren van reć i to da je smokva puna ploda. Šoto smokve po vrtu se jigraju dva črni mačići - sve je'na lipota ... bodulska idila. Ja pijen kafe, fuman, gjedan more "gdje se meni penje" ... Bonaca je kako ulje. Riže ju jedna bela "mega-jahta" ka me tornjuje va stvarnost.

"Mega-jahta". Če ne da se nanke te besede ne uklapaju nikako va onu idilu z ku san van počela pisat? Mići tići, mići mačići, bonaca, škoj, pod Učkun kućice bele... i onda odjedanput nikakova MEGA-JAHTA! Ti selo, skoro da se prestrašiš. Skoro isto kako i BELI PAS. Morski, morski! Zapravo otil ili ne, čovik pride va iskušenje donošenja raznih zaključki (vite, tobož smo doživili nikakove promjene), ma retorika je ostala ista da istija ne more bit. Prominile su se nike stvari ke direktno utječu na običnih ljudi tzv. pučanstvo, pučani, puk ... kmeti bi rekli naši dragi Zagorci (ne generali nego oni ki se nisu omrsili na tujemu potu). Z jenu besedu, na malih judi.

Najgore je to ča vas, kad se usudite neš adoćat i zreć, nazovu nikakovin nostalgičaron. Napad je vavik bil najbolja obrana. Nikad ste bili unutarnji neprijatelj ko ste si dali za pravo mislit; a danaska ste nostalgičar. Uglavnon najbolje van je da uopće ne mislite i da prodate mozak za dobre šoldi komu god komu rabi. Vami zašiguro ne rabi. Mogli bimo reć da ga je čak i opasno i nepoželjno jimit. Aš ko jimate mozak počet ćete se pitat kadi su oni ljudi ki su hodili ovamo na Adriatische Kost zi oni mići gliserići, pak oni z Glastronci (ovo van pišen po novomu pravopisu!). Domišljate se Glastronci? Amamooo! Ja da! Glastronci su jimeli metalik boje po sebi i zgjedali su moćno i elegantno (baren meni kad san bila mića). Dunkve, kadi su ti judi danaska?

Danaska ili jimaš MEGA-JAHTU ili si pover. Sredinu je pojil BELI PAS. Valjda. Samo je jedna stvar danaska ku jimaju svi. Mobitel. On od onih prvih do danaska je jako napredoval. Ekran je sada va koluru, na njemu moreš gjedat video, habat muziku, jimaš fotoaparat - "ol inkluziv" - kako i programi od naših hoteli. Uključiš nikakov "blutut" i pride ti svakakovoga vraga za se proveselit.

Meni je prišal nikakov govor od Tita. Tito govori vjerojatno jednoga dvajsetipetoga maja o tomu kako na svitu ne smi bit manjine ni većine. Kako na svitu postoje samo judi. Skoro ga i ne moreš čut ča to govori, aš milijuni va isto vrime kliču ... I sad me dobro habajte. Aš ja nikad nisan bila va masi ka je klicala drugu Titu. I va glavni grad bivše zemje san dospila leh onda kad zemje više ni ni pod zemju. Ma na sriću ili na žalost jiman onaj mozak koga ne moren nikomu prodat aš ga se boje kupit od mene. Isti taj mozak san jimila i prvo dvajset i više let.

To ča se čuje ti judi ki kliču drugu Titu tako jako da ne moren na miru pohabat ča je to on jimil za reć, kadi su sada leh i oni!? Ni ni njih kako ni onih ki su jimili Glastronci! Ča se je svimi timi judimi dogodilo? ' Ben ti "mega jahtu"! Sad me je samo hitila va sekiraciju! Dumislila me je na to kuliko judi fali na ovomu svitu?!? I dala mi mislit da ni još kadi nika velika jama puna pokojnih klicači drugu Titu i vlasniki od Glastronci?!? Isuse i Majko Božja!!! I ča niki drugi se ne sekira kolo toga, nego san se vero ja morala tomu domislit!??

Ovo je jako dubijozno ma niman vrimena hodit va duboke analize ni istraživanja. (Moran poć na bivši Titov most zi tabelicu "APARTMAN" stat celo popodne ko ću ćapat koga turista zi Sibira. Čula san da jih je prišal puni avijon na krčki aerodrom. Zima će prit brzo, a mora se preživit!). Nego ćo, reče se da kadi je dima da je tamo i ognja, a ča bi onda tek moglo bit nigdi ča se kroz celu povijest nazivlje "bure baruta"?!? Ne smin ni mislit! Zato se ova kolumna ne zove "zač ja volin Tita".

Kako ću ga volit kad je skupa š njin nestalo miljari judi ki su ga volili više od mene? A mi ne znamo kamo su nestali. A to su sve bili mladi judi! Brižni oni, vero se sekiran sada! Zato dragi moji ljubitelji Boduli, volin svoju fameju i svoj balkon, svoju Boduliju na koj je lipo, bonaca, tići kantaju, mačići se jigraju, smokve zriju ... a cela jedna MEGA JAHTA pasuje sprid moga gradića i mi ćemo njoj naplatit čagod budemo znali i umili ... pak ćemo nadoknadit to ča ni viš ni jednoga Glastronca.

Lipo se reče da je svako zlo za niko dobro! Valjda. Amen!