Pred niki dan mi je prišlo na pamet kako smo mi zapravo jedan narod ki se vero ničesaremu ne zna domislit.

Samo zmišljamo nikakovi zakoni za sve i sva, a sve rješenja nan stoje sprid nosa, ma jih ne adoćamo. Dokle nan niki drugi na njih z prston ne pokaže.

Ljudi! Nemojte gledat Dnevnik ni burzovna izvješća. Ni to za nas. Gledajte EPP! To van je najedukativniji del programa.

Gledajuć EPP meni je prišlo ćaro kako ću se liberat svih problemi va životu.

Poć ću na komunadu, zibrat jedno pet-šest ulik i upisat ću se va Registar poljoprivrednih domaćinstav. Prijavit ću da se bavin zi MLIKOMASLINARSTVON. Onda ću iskat državni poticaj. I počet z biznison.

Ča je to mlikomaslinarstvo?To van je novi oblik poljoprivredno-stočarske djelatnosti. Imaš maslinu-uliku. Tj. rabi ti jedno stado ulik.

Te ulike ke si zel za stado ne pobiraš za dobit ulje. Njih svaki dan moraš poć pomust. Friško pomuženo mliko, će moj muž z kamijonon hladnjaču peljat drito va tvornicu Paglieri va Italiju. 

Aš oni delaju Palmolive gel za tuširanje zi maslinovin mlikon.

Računan da ću za dva-tri leta postat prava bodulska takujinica.

Drš'te mi fige! I mojimi ulikami da njin vimena budu vavik puna i debela.

Ko mi bude rabilo pomoć kolo mužnje, ću vas zaposlit, ako ostanete bez posla. Ala bog. Jušto fugan na Prnibu da zberen mlikonosne ulike – zovu se "šarke".