Vero je pakleno teplo ovih zadnjih dni! I kako za vraga baš se ne moren kupat, aš da gren vjerojatno biste jutro prikojutro čitali na naslovnici od "Dvajsetičetire ure" kako je sprid Krka adoćana bela psina, a da je za to kriva kolumnistica od "Lupige" aš se je šla okupat ...

Brižna Kristina zi Survajvjora jedan celi dan ne bi mogla pokazivat cice čitateljimi i čitateljicami ke isto tako vole cice ...

Nego, evo ga na lipo su nan se tornali naši dragi biznismeni ki se vole nazivat vikendaši. Nikad se nisu tako volili nazivat i stalno su kukali kako jih ne volimo - mi domoroci. Sad vole da jih zovemo vikendaši, aš bolje je da jih i tako zovemo nego znajmljivači - to bi mogal čut ki god inspektor (od onih ča se ne daju potkupit) pa bi bilo belaja ...

Dunkve, oni su lipo na svoje makine zalipili naljepnice I srce otok Krk i svi do je'noga imaju već i RI tablice. Tako da nisu više ni vikendaši (aš vikendaši moraju plaćat porez na vikendice, a i most bi morali platit jedan put na leto kad ne bi imili RI tablice). Tako van je sad jedna lipa masa Zagrebčani primorana slavit pobjedu Rike va nogometnon kupu, a sve to radi Bodulskoga RI pedigrea.

Nego dogodi se kad god da ki god taj takov domaći pride pameti i prizna da je vikendaš - ma to samo kad je u pitanju viša sila, kako onaj ča je pred niki dan prišal doma nakon celih leto dan (kadi je bil leto dan to je pak njegova intimna stvar - ča ne!?). Ćo, pride čovik doma nakon leto dan i vidi da mu je doma dar-mar! Niki mu je očistil "dom" dokle njega ni bilo doma ;) ...

Ne sekirajte se. Sad će takovi naši domaći hitit vanka razno razne tabelice i svitleće reklame "ZIMMER FREI" i ko su i imeli kakovoga manjka priko zime - dokle nisu bili doma; to će nadoknadit sad kad su doma namor! Ki nima šoldi za reklame, ni živci za teć na Krčki most dočekivat gosti, kupit će kakovoga pasića i redovito ga prošećivat 150 puti na dan po kuntradi, a znate, onda se trefi na cesti koga god Čeha ki ne voli poć na agenciju aš je tamo cjenkanje zabranjeno i tako van to gre ...

Ako ne volite ni pasi, e onda tečete baren do kontejnera jedno trihiljadepetstopedeset i dva puta hitit smeće pa ćete i tamo jur koga god trefit.

I tako to svake sezone, u isto vrime po ne znan koji put u našen gradu cirkus ZIMMER FREI - mozak bye-bye. Ča san napisala cirkus!? Ma ne, ne, oprostite, mislila san na "ciklus" ...

(svaka sličnost sa stvarnim događajima i osobama je sasvim slučajna i nenamjerna)