Ben, prišlo je vrime za mislit na novu kolumnu, a kako sezona još traje, ja bin se još malo fermala kolo te teme.

Ovih zadnjih dni svaki Božji dan čitan i slušan va lokalnih novinah i na radiju o nikakovomu džumbusu kolo Opatije i njezinih hoteli, privatizacije i takovih munjenij. Čitan i mislin se … Da ni Opatija va igri, pitaj onoga gori ko bi se dizala takova prašina. Da me ne bi ki krivo razumil, niman ja niš protiv Opatije ni protiv prašine (takove vrste), nego malo me zaboli kolo srca aš se vajer domislin onoga malinskarskoga Haludova i njegove sudbine …

Haludovo je bilo hotelski grad. Zaštitni znak Malinske i otoka Krka. Prvi disko za koga ja znan je bil va "Tamarisu" i zval se je "Big T". Hotel "Palace" imil je, ja ni sama ne znan koliko, zvezdic, nutarnji i vanjski bazen već u to vrime, a bile su to sedandesete, kuglanu, night bar, teniski tereni, vile, šetališta uz more i kroz mini golf tereni mej vile.

Tako lipo šećuć nogu za nogu, uz more ili kroz hlad, prišli biste do Ribarskoga sela ko je baš tako kako mu ime govori bilo i zamišljeno. Kako jedno malo mestićo z rivicu i barčicami va portiću … Ljudi moji to je bilo neš! Sve dokle ni prišal niki rod od Šekspira (tako baren ćakule govore) i sve ruvinal …

E, aš kod nas se niš drugo ni ne zna nego ruvinjivat. Kupi se par hotelčići ili ovako celi jedan hotelski grad za oprat ki god šold i kad se šoldi operedu koga više briga za hoteli ni za ljudi ki tamo delaju. (Bemu miša, ča nisu onda mogli lipo kupit i ruvinat samo jedan vešeraj!?) Kad se šoldi operu, gleda se samo kako se ča prvo toga sranja od kupljene robe liberat, pa se preprodaje, kako i polovni auti. Onda to kupi opet niki drugi komu rabi njegove šoldi oprat i tako bez konca i kraja (a onaj vešeraj bi bil sve to razrješil op.a.). I kadi smo sada?

Sada Malinska, nikadašnji šampion turizma tadašnje zemlje, ima jedan novi vid turizma. Zove se "Ruinen Turismus". Gosti se moredu šećat mej ruševinami od "Tamarisa" koga su zravnali zi zemju  i slikat jih (onda doma moru govorit kako su bili u Hrvatskoj kadi je bil rat i kako su vidili ruševine i kako je to moral bit jako grdi rat i kako su oni lipo znali da je rat bil i na Jadranu i zato nisu hodili ovamo na godišnji zadnjih dvajset let). Moredu uživat i u "Horror turizmu" ako se parte po noći – kad rasvjeta ne dela, aš ki bi plaćal struju, pa kad one rasklempane žaluzine ke niki ni ni taknul trejset let, na "Palasu" zasviraju strašeću pjesmu zmišljat štorije o duhimi va Haludovu. Vite, kako je to višenamjenski; rekal bi Đuro zi kućnih čarolij!?

Sve u svemu ljudi moji kadi je Šekspir, tamo je i tragedija. Va Malinskoj je to dobilo još jedanput potvrdu!

Ala stojte kuraju, aš stojimo i mi.