Ovo sam. Ajne kurce pauze se je ovoga puta fanj produžila. A ča ću. Nikad niman o čemu pisat, nikad mi se pisat ne da. I tako dan za danon, šetemana za šetemanu i od šuba pasa misec, dva …

Pasanih sedan dni mi je bilo fanj napeto. Ne napeto va negativnon smislu nego baš obratno. Onako va mojemu stilu. Prvo smo bili cela fameja na koncertu za Luku Ritza. Fermali smo se va Zagrebu celi dan, upoznali puno dragih judi, videli starih dragih judi. Nahabali se dobre muzike i punoga srca se tornali doma.

Ondat san već za par dni bila nazad na Interliberu. Kadi god je nika novitada tuteka san i ja, pak je tako bilo i ovaj put. Pravo iznenađenje su mi parićali Nenad z digitalnih knjig i poduzeće Fravero kad su objavili moj libar od pjesam „Diskrecija zajamčena“ ča bi po domaću bilo neč kako „ Ne boj se neću nikomu niš pravit“. A kako se dela o erotiki onda bi domaći naslov moral bit i duži i zgjedal bi ovako: „Ne boj se neću nikomu pravit da ti je mali“. To kako bi oni ki kupuju libri znali da je to „šporki libar“.

Ste adoćali da na nedilju čovik nima ča pogjedat na programu!? Vero sve same bedastoće. Ničesare zanimljivoga. Tako i mi doma sedimo i ćakulamo. Pijemo kafe i nikako smo prišli na ćakulu od pisanja i od libri. I ondat me je muž pital ko san van napisala kada ki je moj prvi objavljeni tekst. Bogme nisan rekla san ja i pala je ideja za ovu kolumnu.

Nikada davno, mi Vejani i otočani imili smo svoje novine. Krčke novine su se zvale. Ne domišljan se više kako su hodile vanka ma ja mislin da misečno. I tuti san ja znala kadgod čagod napisat. Ma čagod bin bila napisala, sve bi mi bili zisikli i pol toga cenzurirali (već ondat san bila huda) pak nisan vero jako bila zadovoljna. Istešo, bilo je lipo imit te i takove novine.

Ondat san se jednoga dana jadila kako ča god pametnoga napišen neće niki objavit, a ko bin napisala kakovogod sranje to bi mi šiguro i va Beogradu objavili. Mladići ki su bili kolo mene va ton momentu, nisu bili leni i prnesli su mi jedne druge novine od sporta – ja mislin da su se zvale „Tifo“ ili tako nikako i rekli su mi neka napišen niku bedastoću za pisma navijači pa da ćemo baš vidit ko je to tako.

Ne budi lena, ja san odmah zela olovku i napisala san va te novine pismo od navijačke skupine „Cosa nostra“ zi Veje. Napisala san njin kako smo mi dobro organizirana navijačka skupina i kako nas je par stotin. Napisala san kako imamo bubnji i trube i da navijamo za jako dobar nogometni klub NK „Krk“. Napisala san i nike blesave nadimki za vođe te grupe navijači, pozdravila svih drugih navijači va tadašnjoj Jugi i svimi poručila da dobro gledaju kad igra NK „Rika“ aš da smo mi na tribinami zi velikin transparenton (ne moren se domislit kih dimenzij) na komu piše „Forza Veglia“. I napisala san još da mi dosta slabo govorimo srpsko-hrvatski aš da su za vrime Drugoga svjetskoga rata ovuda bili Talijani i da su naši stari morali hodit va talijanske škole.

Već va drugon broju od „Tifa“ ta moja švrljotina je bila od prve do zadnje besede objavljena va „pismimi od navijači“. Amamo ma smo bili kuntenti. A tek ja! Ja mislin da moj brat još nigdi ima spravljen taj historijski primjerak „Tifa“ va komu je počela moja spisateljska karijera.

Ala Bog z vami. Lipo sanjajte. Da je Božić i da je leto niko retro. Kad niste ni znali ča je to božićnica, ma vas bogami za nju ni bilo ni briga.