... je dan gospodnji. Peti misec, sve diši. Vrime lipo. Turizam se budi ... Na momu škoju se dela sve u šesnajst (vavik se počinje u isto vrime da furešti vide kako se dela!) to se ruje, to se kopa, to se cimenta, asfaltira, to se delaju pune i sprekidane crte po cestami, to se čiste apartmani, to se uređuju vrti, fasade, balkoni, kupuju rožice ... ma cela munjenija!

Folk of the island Krk je partil turbo. Počinje doba va letu kad na Boduliji ne žive Boduli. Na Boduliji od prvoga maja živi Turbofolk! 

Nedilja, gledala san dnevnik ča van dosta slikovito dočarava moje beznadežno stanje ovoga popolneva. I ča!? Niki nikoga danaska ni ubil (moglo je bit veloga sranja na zagrebačkon aerodromu, ma ljudi su već i Bogu dopizdili pa je nastavil žvakat Snickers i sprečil katastrofu); niki se ni zapalil, niki niš ni ukral, niki ni napravil teroristički napad ... ljudi su svi bili na procesijami i hodočašćimi, ko ne radi zaveti i vere a ono radi onoga rižota na splitskoj rivi ...

Meni na taj rižoto i nisu jako hodile sline, ma su zato na onoga mrkača z krumpiron pečenoga šoto peke ... amamo! E š njin su se pogostili kumpanji pisci ki pišu Evropske kratke štorije - ča je onda tamo delal onaj z Kube, ne znan (morda je to Božja providnost, aš je Kastro već fanj star pa ... ki zna kamo ćemo mi z granicami od Evrope arivat, ča ne!?) ...

I tako, nedilja, ljudi su svi bili kolo crikav i kolo stoli kako pravi krišćani, dobri i bez grihi.

Ili ovako miran dan moremo zahvalit ovomu prolićnomu umoru i trudu ...

Ili se je i urednik dnevnika Milić smilil na nas, pa rekal sam sebi, "ala večeras ću udelat neš ča vero niki ne očekuje" ... i nikako mi smrdi da je to alternativno rješenje zagonetke nediljnoga dnevnika i jedino ko je točno.

Dajte ljudimi mira! Magare na nedilju!