Ben, ovo van je jedna lipa stvar; kad vaša Ida ostane bez španjuleti (čitaj: cigareti) ... I onda moran zmišljat novu kolumnu za Lupigu da ne mislin o tomu kako mi se fuma. I znan, huncuti je'ni, ča van se sada mota po glavini, ma moran vas razočarat. Ne ni njega ni doma, pa da makar tako zafuman ... E.

I ča sada, kad smo već kod španjuleti, cigareti, fumanja i fumad, meni momentalno padaju na pamet asocijacije. Vele, miće, tanke, duge, kratke i debele ... kubanke (o cigaretimi govorin) ... i kakove to sve veze ima jedno s drugin i z ničin trećin.

Ste vi šli za tin kako se zadnjih let pojavljuju nikakove teme, besede, pojave za ke do pred niko vrime nismo čuli - ča ne znači da jih ni bilo kolo nas. Samo niki ni abadal. Sada odjedanput krcata zemlja pederi, pedofili, svi patimo odjedanput od stresa, svuda kolo nas je prisutan nikakov mobing ... Sve same novitade ke su po svitu od kad je svita!

T'r čovik od kad je počel delat, a to je bilo još dokle je va školu hodil zna da je na poslu vavik (ali vavik) niki čovik z malin "dikon" ili nika ženska koj je škuja doli veća nego škuja gori pak su zato jako jadni i nesrićni, a doma njin ni više gušt na nikoga blet, aš doma svi znaju va čemu je problem; pa te svoje frustracije žele zličit na poslu.

Najveći je gušt kad imaš na koga blet ako su kolo tebe još nikakove stišnjene guzice pa te gledaju zi širon otvorenimi očimi punimi straha kako ti bleješ na nikoga - ni uopće bitno na koga ... bitno je da oni gledaju, ti bleješ, i gledaš kako njin se gaću tresu i vlasi dižu od straha od tebe ... onda se i tebi najzad digne onaj mići "dik" i ti se odjedanput osjetiš jak kako bik!

U ženskih je pak druga varijanta. Njimi se od vele bleke stisne. Svaka škuja (samo ne ona kroz ku bleju). A to je osjećaj ki se more mirit zi prvo spominjanin dizanjen. I zato se ne smimo jadit na naših mobingatori. Moraju i oni kad god doživit vrhunac. Pa magare i priko naših uši ...

Poznato je da svaka munjara z vrimenon naleti na još veću. Onda obično na kraju jedna od dvi munjare zrecitira jako nan poznati tekst: "Sad ćemo vidit čija mama crnu vunu prede." I onda sve počne sličit na kviz "Najslabija karika" i niki ostane bez niš ... To je tako va životu. Svakomu prema zaslugami ... osim onimi ki su zaozbiljno neš i zaslužili, i nikoga zadužili ... Ma to je već druga tema, o koj ćemo niki drugi put. Danaska da su timi istimi počeli slat rješenja (bit će to neš sličnoga kako i zi penzionerimi) ... neš mi šapiće da će bit baš tako!

Zato san ja na vrime napisala onu "Generacijo" ka je nigdi va arhivi novic!