Vaje pokle Tri kralji počinje doba od munjenij ko građanska klasa voli zvat "doba karnevala". Za nas drugih to su maškare, a ovdi kod mene celo je to doba vrime od Mesopusta.

Mesopust van je lipi moji nasušna potriba današnjega čovika. Antistres terapija, demobingizacija i slično. Vavik su se ljudi volili maškarevat (ja ne - frustracije z ditinjstva kad su me obukli va Crvenkapicu, a ja san otila bit Winetu) i baren za kratko bit niki drugi. Ljudi valjda maske zbiraju prema tomu ča bi otili ili ča bi otili bit. Pak se muška kumpanija redon spravlja va ženske i to najviše va kurve. E sad, ja ne znan bi oni otili bit kurve ili bi otili kurve ili su pak istinske kurve ma ne smidu javno reć!

Zadnjih let fanj se njih spravlja i va bogatuni. Pridu z jahtu od hartuna na balinjere va niki dom ili salu. Ma ovoga san leta adoćala da su se počele javljat i nike maske ke nikad nisu baš bile ni moderne ni va điru. Ljudi su se počeli obučevat va sobarice. To ja tumačin z velin brojen nezaposlenih. Oni na taj način pokažuju svoju goruću potribu za poslon magare i sezonskin!

Već od drugoga leta očekujen sve više maškaranih va smetlari, pokusni kunići, dobrovoljni davaoci vlasi za presađivanje i svega drugoga ča se more dat, ako će se za to dobit ki šold. Ki godare se morda obuče i va kontejner za pet ambalažu, drugi va plastične boce, a treći va onoga ki jih pobira i nosi va butigu. Kako stvari stoje ta ista kumpanija će imit za svaku subotu svoju vrstu smeća za masku (biootpad, akumulatori, stare gume, stari Yugo za 300 kun ...) ...

Od kada je počela i akcija HITRO - vjerojatno će bit i puno novopečenih direktori od "prikonoći otvorenih novih poduzeć" ... i tako naprvo. Kako svit gre naprid, jedni staraju, a nova mularija dohaja, tako se i muzički ukus na maškaranimi tancima minja kako i maske. Najbolji recept za dobre i uspješne maškarane zabave je red Tompsona red Cece. To je muzika i naše i vaše mladosti i više niki ne rabi znat tancat! Ča će njin znat tancat kad su celu feštu na kolenimi i šire ruke kako i Isus!

I tako van to lipi moji traje ovuda po Kvarneru, tuliko i tuliko subot (ovisi je dugi ili kratki Mesopust - e vi'te i on more bit dugi ili kratki!) sve do utorka od Mesopusta kad se munjeni po celi dan. Na taj dan (kako kadi) čitaju se napovidi, sudi se Mesopustu ki se svakoga leta drugačije zove (ma vavik je dežurni krivac za sve - srića bog da i takovoga jednoga imamo!) i na kraju ga se zapali. I opet se fešta (ovo van je glagol, a ne imenica!) sve do zvona od Čiste Srede - Pepelnice, aš taj zvon je znak da je počela Korizma.

Znimlju se maske, svaki se tornjuje va ono ča i je. Muški prestaju bit ženske, sobarice i opet ostaju bez posla, dobrovoljni davaoci se predomisle, pijani se otrezne ... i kako da niš ni bilo ... većina jih je drugi dan va crikvi na maši i va redu za se pričestit - namor!