Čera večer je moja fameja (tri od nas) pokle čudo vrimena imela zajedničku vičeru; ča bi reć da smo svi tri va isto vrime sidili za stolon svaki zi svojin pijaton sprid sebe i jili paštu z' tunu po Lupiginon receptu ...

A, nego ča, nego mi vrag ni dal mira pa san, dokle smo tako jili i pili, šla gledat va onu škatulinu od televizije ka se je i ovaj put pokazala kako puni pogodak ako nikomu (čitaj meni) želite hitit vičeru va grižu.

Najprvo se je ona muškobanjasta zi Kolonije na pune usta hvalila zi svojin auton (i ja bin se da mi je to mužu sporedna djelatnost). Bi reć da je TV emisija snimljena prvo leh je silikonizirala cice (a dokle san čekala red za blagajnu va butigi san pročitala da je i to platil muž i da mu je jako zahvalna za to), aš da ni tako jur bi nan se bila malo prsila po ekranu ...

A dobro mislin ja, ženska je sila vesela, stalno se kikizdri kako Bonika (Bonike će se sjećat malo starije generacije one rojene pokle prvoga rata - ti selo počet ćemo se raspoznavat po tomu ki je rojen prvo, za vrime ili pokle koga rata! - ja mislin da je reklamirala nikakove gumene čižme za po dažju) pa ću ju prožvakat.

Ćo, ma cukar vavik pride za kraj, pa tako su i va toj emisiji pokle nje pokazali kako je va Splitu bila modna revija za hrvaški džet-set (ja još vavik mislin da su to oni ki hode na butigu z avijonon) i to ni manje ni više nego od Huga Bosa-noga ...

Mamo lipote! Ma kako i obično ta prevela lipota je lipa dokle drži usta širon zatvorene. Za to je pravi dokaz žena od Bobana nogometaša (ne znaš ko ona govori ili nosi papagaja skrivenoga va dekolteu) ... Meni se želudac već pomalo diže ...

E, bilo je totu još puno lipih stvari. Nika manekenka se je rastopila aš je nono Vargek od Severine rekal da mu je ona (jušto punoljetna) najlipša od svih ... Moj želudac je prišal va pluća ...

I za kraj ćapali su jednu neprirodnu bjondinku pitat ča misli o toj svjetski poznatoj reviji Bosa-noge va Splitu. Ljudi moji, ona je bila ma presrićna ča je mogla bit tamo, ma sva se je zaslinila od uzbuđenja, a srića Bog da ni oženjena (baren meni tako zgjeda), aš da ju je muž vidil na televiziji bilo bi ga kolpalo kada je dotična dama izjavila kako će dignut kredit od sto hiljad kun za se obuć ... Oprostila san i njoj - ko prirodna ko neprirodna bjonda je - ča bi kod nas rekli bela ... želudac mi se vrnul na mesto.

Ma se sve bojin da ko počne malo više po te-veu davat izjave, mogla bi i stara divojka ostat!

Prijatno!