Kad narasten poć ću za zidara. Aš su zidari bolje plaćeni nego doktori. Tako danaska piše va novinami. Teško je bit doktor. Ča sve moraju pasat ti nebogi i nemilni doktorići samo zato da bi njin na vratimi od kuće moglo stat dr.mr.sc.pc. i ča ja znan ča sve ne i ondat na kraju jedan obični šporki zidar ki ne zna niš nego samo meltu mišat da bude bolje plaćen!?

(Ki zna ki je doktoru zgradil kuću!? Morda mesar!!??)

Zato se ta nepravda mora pod hitno ispravit. To se jako lahko napravi. Za sve ča ne valja va ovoj državi su krivi ljudi. I oni će to sve lipo platit. Ljudi kod nas su kako čepi. Š njimi se začepljuju sve škulje. Pogotovo one financijske. Vavik se najde niki Franjo Tahi za pobirat nameti od neukoga puka. I od zidari.

Tako z vrimena na vrime pride vanka nika štorija o nikomu nebogomu doktoru ki jedva spaja kraj z krajen miseca. Onda, aš kako je pametan (da ni, ne bi bil doktor) je zmislel kako će rješit problem svoje egzistencije pa je počel naplaćivat usluge ljudimi za kih zna da nimaju drugoga izbora. Il će mu platit il će poć Sv. Petru janjci past. A kako bi svaki otil živit to će brižan čovik magare dignut kredit i platit doktoru neš, za ča neće nikad dobit ni račun ni garanciju.

Za sve ča ne valja va ovoj državi su krivi ljudi. Ovo ja potpisujen.

Počne z nikakovu bombonjeru, fini zi silne euri za ke ja moran delat 10 miseci, aš nisan ni doktor ni zidar. Ki mi je kriv!? Ma, istešo ki je kriv doktoru ča je otil da mu na vratimi od kuće piše dr.mr.sc.prc. - je mogal bit zidar! Niš mu ne bi pisalo na vratimi i moral bi pit manje alkohola a više mlika, ma bi bil bogat. Greška va procjeni, skužaj lipi moj dottore.

T'r san i ja mogla lipo bit kurbičina pa bin bila bogata. I onda bin i ja imila cjenik, a ne bin davala računi. Garancija bi bila zadovoljna mušterija ka bi šla van z koga god prćaka ki bi bil moja ordinacija. Kad bi oni ki vani čekaju red videli kako je blažen onaj ki je jušto šal vanka - ča će njin bolja garancija!? Čovik pak kad čeka za poć u doktora pa kad vidi onih mučnih i bledih ljudi ki hode van z njegove ordinacije, šubito bude mrt. Više mu doktor ni ne rabi.

Ljudi, ko želite živit, ko vas ča boli hote kod kurbičin - jeftinije su i neće vas ubit baren ne šubito, a va Kini su zmisleli cjepivo protiv AIDS-a ko ne izaziva nikakove nuspojave. I to je neš danaska.

Z druge bande, va istimi novinami raspeli su kako na križ onih brižnih oca i materu kimi je zgorilo dite v Riki. Za razliku od svekolikoga razumijevanja za nebogoga doktora ki je imil kolekciju svih svjetskih valut va škafetinu od stola; za ovih niki nima razumijevanja. Slikaju jih kako plaču, zimaju njin dicu, ljudi se zgražaju nemara ... Niki se ni zapital zač su ljudi (a mej njimi i ta fameja) va ovoj državi prišli na takove niske grane; niki se ni domislil ko je i on kad god moral pušćat samu dičinu doma da ne bi dobil otkaz ili da bi mogal platit račun od struje, niki ne osjeća potribu da bi timi ljudimi izrazil saučešće ... niki ne išće uzroki tamo kadi je njihov zametak. Za bazeni va Riki su već prodali obveznice pa se više ne rabi reklamirat i glumit velu humanost kako su to delali komediju pred par miseci z onu drugu brižnu fameju ku su kako cirkus peljali i ovamo i onamo za reklamu! Ovi ljudi i njihova tragedija su se dogodili va krivo vrime. Niš ne rabi prodat, a ni izbori nisu na vidiku ... i zato su za sve sami krivi!

Za sve ča ne valja va ovoj državi, krivi su ljudi! Zato, kad narasten ja ću bit zidar. Da iman puno šoldi - za doktori.

Mali Pere z pušku