Prvo moran bit poštena i reć kako me već tuliko ni bilo ovuda da se jedva snalazin. Srića bog da iman par dasak va glavi pa mi klikeri (ka smišna beseda! još vavik san kontaminirana z bivšu zemju) prodelaju fanj brzo. I ovo san ovdi, tako da vas malo vidin i da znate da vas nisan pozabila. Ča se je novoga dogodilo va to puno vrimena? Pravo za reć, jako malo toga.

Va Veji (drugo ime grada Krka) se je otvoril Super Konzum! Ajme veselja! Ala, dobro je da je i jedna takova butiga ovdi, da se ne mora hodit po svaku bedastoću tamo va Riku i na Kukuljanovo. A valjda se je i čagod ljudi zaposlilo - i da dobivaju plaće i da su kuntenti (za ovo potle crtice već nisan šigura). Parkiralište je vavik puno ča bi reć da je i posla. A ovo je već pomalo i vrime kad naše pučanstvo počne švikat na sve bande i trošit kako munjeno.

Sve to nikako počne kolo Svih Svetih za kih stalno na televiziju govore kako je to "Dan sjećanja na mrtvih" - kako televizija va jednoj kršćanskoj zemlji more plasirat takovu dezinformaciju!!?? Ovdi kadi se dica već rode zi znanjen prve poslanice Korinćanimi, ta ista dica kad narastu puše fintu o tomu kako su Svi Sveti dan sjećana na mrtvih! Ma ča njin ime lipo ne govori kako je to dan Svih Svetih!?? Je, istina je da su sveci svi prvo morali umrit prvo nego su postali sveti, ma to ni razlog da se dan sjećanja na mrtvih proglašava jedan dan ranije nego ča je. Bašta! (Ovo ni Vrt, nego Stop!) ...

Ben tako, pasal je taj dan Svih Svetih i drugi je dan prišal Dušni dan ili Dan mrtvih. Nigdir ni slova, ni besede. Ničesare. Glavno da su se nosile on prvi dan nikakove plastične venci zi isto tako plastičnu sviću va sredini z Konzuma i vjerojatno i drugih takovih butig. Ki će više toga nosit za sjećat se svojih mrtvih ... Kompetišn konzumerizmom opsjednutoga svita. Vero za se prestrašit. Ni ni čudo ča se baš tada dogaja i Noć vještic o koj smo mogli čitat kadi god i ča god smo otili. Da, aš to je neš novoga zi čin sad rabi otrovat ovaj bedasti puk pa da troši još i za to aš ionako ne zna ča bi zi šoldimi.

Dan mrtvih već znaju pa je dosadno to stavljat na televiziju, a i ča će se stavljat neš za ča su već potrošili ča su mislili za Svih Svetih! I na kraj kraji svit je za živih, a živi se moraju zabavljat, pak ćemo mi njimi lipo sad uvest zi Merik Halloween aš onaj naš Mesopust, Maškare, Škrabunosnik, Karnevo i kako ga sve već ne zovu, a traje sve od Trih kralji do Pepelnice nan ni dosta. Mi smo nacija ka jako voli nosit maske pak ćemo mi celo leto napravit HALLOWEEN pa magare pojili i svoj drek. Nami je vavik tuje bolje od svojega pa smo tako va Konzumi i šoping centrimi pušćali i ono malo osjećaji za svojih kih više ni!

Bravo mi! Vero san kuntenta s nami!

E da! Čera san bila va tomu Konzumu va misečnoj provišti. Već su posložili plastične borići, balice i jaslice - da se ne bi zakasnilo nikamo - a još ni ni vrime od Adventa! Mrtvi, ma i vještice su tempo pasato! Ne znam ko oni ki to određuju i ki na tomu delaju bilo kada misle da će i oni jednoga dana bit isto persone pasate! Da misle, malo bi stisnuli kočnicu ki god put! Ako ju još imaju.