Ovdi kadi smo prisiljeni živit otili – ne otili, aš ovdi nan je Bog našal mesto na ovomu svitu (i reć za pravo nimamo se ča jako ni žalit), svaki od nas mora imit niku "kravu" ka će mu pomoć preživit leto.

Tako san i ja imila "kravicu". Zvala se je "soba druge kategorije s gratis upotrebom kuhinje". Ni ta krava davala Bog zna ča dobroga (više puti me je glava dobro bolila radi nje) … ma istešo, čovik je blesavo stvorenje, pa misli da mu je puno bolje samo ča mu se nike ekstra šoldi mišaju malo po rukami … a kad zbroji dva i dva pride na minus osamdeset! Zi tako malu kravicu – jasno!

Radi te moje brižne male krave, san upoznala i sutkinju za prekršaji aš me je inspektorica tamo poslala (radi opravdane sumnje da se ja uz pomoć moje male krave silno bogatim) … i tako bi ti inspektori kod mene provodili vrime radi jedne neboge krave, dokle su njin cela stada sprid nosa pasla tuju travu … Ma ja san doma, vavik dostupna; a owneri stada su posvuda samo ne va svojoj štali, pa njih niki niš ne pita i njihove stada pasu neometano.

E onda su se ovoga leta na Ministarstvu svega i svačega i turizma sjetili da bi mogli naplaćivat lipo paušal. Pa će svaki platit za svoju kravu onoliko kuliko se oni sjete. Po broju vimena.

Tako je lipo prišlo meni za platit za tu moju brižnu kravu križanku isto kuliko i nikomu ki ima punokrvnu kravu z pedigreom a zove se "Apartman za dvije osobe s tri zvjezdice". Samo ča ta krava to zaradi za dva dana, a ja z moju miću, za dvi šetemane …

Kako ja, tako i drugi moje šorte, odlučili smo poubijat male krave križanke pa je na Hrvatskoj obali nastal pravi pomor malih krav. One vele i debele sad će bit još deblje …

Samo, meni se čini, da od kad su "in" te vele, debele krave; samo njihovi vlasnici i imaju koristi od turizma. Moja zemja (kako bi rekla ona dalmatinska klapa) baš i nima previše koristi od te vrste govedarstva.

Aš buhe i obadi ke pridu na tako debelu, punokrvnu kravu ćapaju se za nju kako i čeperi i ne rabe se od nje maknut ni milimetra – a ona, mesto da maše z repon i tira jih od sebe ća, samo fantazira o zvjezdicami kolo svojih rogi i za niš ju drugo ni briga …

Mislin da na celomu svitu samo ovdi takove krave egzistiraju i da nan zato kako god obrnemo vavik isto, pozdolu hodi!

Kako bilo da bilo, moje kravice više ni, a ja lipo uživan va praznoj štali – svoja na svomu! Prvu sezonu! Ala Bog!