Baš mi je pala va oko, pasani put kad san pisala kolumnu, jedna pojava. Kako prvo, meni se para da san jedna od retkih ženskih ke ovdi pišu (baren, ono ča bi se reklo, fanj na gusto il ko ćete rađe aktivno). Morda ne vidin dobro, ma bi reć da je tako.

Drugo, kad ja napišen kolumnu, šubito ju za manu napišu svi tri aktivni muški i onda ja aktivna postanen retroaktivna, aš me se more pročitat samo priko arhive. Neboga, kako da mi ni dosta arhive celoga života aš mi je to posal, pa se i ovuda stalno moran iskat po arhivi. Prst sudbine je to.

Treće, kad mene udelaju retroaktivnu na brzinu, onda se umire i miruju. Ko ja ne bin niš napisala jedno dva, tri miseci, jušto tuliko se ne bi ni mej kolumnistimi niš dogodilo. Priden ga kako sup. Bitna san za držanje ravnoteže na Lupigi.

Stare kolumne su kako ovce na samrti. Ondat ja priden z one krilina od dva metra i onu belu glavu. Hitin ovu jednu čakavsku samo da prestrašin ovce da počnu o sebi mislit, da živnu kako bidu i same sebi i meni pokazale da nisu krepale ... I, za dva tri dni tap, tap, tap ... tri nove kolumne kako pečurke potle dažja.

Ili, postoji i druga verzija. Ipak san ja ženska. A kako san već rekla, zgjeda da su ovdi ženske nikako deficitarne. Pa se morda muški umire dokle se ja ne pokažen. E onda kad osjete moje prisustvo, onda se uzvrpolje, pa se počnu kako pauni z one lipe perjanice -samo od besed, prčit sprid mene da bin jih adoćala.

Hm, i to je moguće. Samo od toga veloga prčenja, oni svaki put mene hite vanka. Kako da san na zjogu, a ne na Internetu. To smo ti mi ženske. Kako god obrneš ne valja.

Ko smo supi, nastane gužva va kokošinjcu, halarm, panika; pa poginemo va stampedu; ko smo žene i mehke, ukras prirode opet nastane gužva, halarm, prčenje i opet smo mi te ke posišu veslo. Sisanje i arhiva su nan zgjeda predodređeni z prston sudbine :).

Ja, dobro ste šli za tin. Ovaj put baš nisan imila potribu ćapat se nikakove teme. Pišen ovo i kako da san va wellness centru. Vlasi su mi mokre, zamotane va šugaman. Pozabila san da san pofarbana va črno pa san jih šla zamotat va žutoga - taj će bit za va smeće nakon ovoga moga tretmana lipote. Još mi samo fali kadin šoto stola i sol Lokunja z Paga, pa da malo i noge namačen ... ča bi čovik drugo mogal delat va nedilju, kad ne dela?

Ko se morda pitate, ča san ja vami otila z ovin ovoga puta pravit, dobro se pitate. Aš ko mislite da van nisan niš otila pravit ste se malo prevarili.

Digo, nedilja, ženska ...

Dokle nike druge ženske briju kako su se leh na sada zbudile aš su čera celu večer bile vanka; ja brijen noge i čupan nikakove sumnjive črne dlake ke su mi počele probijat na dno brade!

One su se jušto zbudile, ja ću još malo poć spat.

Njimi komadi padaju va oči, a meni pojave na Lupigi ... E to je već za se jako dumboko zamislit!!!

Finile su Mare bali! ;))