Lipi moji, znate vi kako van ja pišen ove redi ovdi?

Seden za makinu, otvorin ovu puneštricu za urejenje napisanoga i pisanje novoga buletina i počnen pisat.

Napišen prvu besedu i od nje sve počne. Ma, vavik mi se par dni prvo neš dogodi ili mi se zakuči za oko, pa već tada počnen mislit kako bin o tomu mogla napisat novu kolumnu. Tako mi je ovaj put na žulj zamastil taj "Vinofest".

Kuda god pasujen čitan: Domaće je domaće. Domaće je najbolje. Domaće je nazdravije. Domaće je sve naj. I ča reć?? Niman ja niš protiv toga. Budimo mi Kroativni koliko god ćemo. Kupujmo Hrvaško, kupujmo domaće ... A ča smo mi!? Ili ki smo mi!?? Ča mi nismo "domaće"??

Nego ki nas je udelal? Francuzi? Ili Iranci? Da ne bude prišlo na kraj da su svi od nas prišli vanka, a ne mi od njih! Ki zna ča će nan pravit one piramide va Bosni! Balkan, centar svita - ma znala san ja to od vavik. Odovuda sve vavik počne. Ma sve i fini!

Nego, ča san van ja otila reć. Vite kako meni šubito misal pobigne ... Morala bin pisat dvi-tri kolumne va isto vrime. Otila san van reć kako nan kakaju kako moramo kupovat domaće aš je domaće najbolje. Mi njimi to vjerujemo. Ma ne vjerujemo da oni vjeruju va to.

Aš da vjeruju, onda bi domaći čovik imil posal. I ne samo posal. Imil bi i pristojnu plaću, penziju. Onda bi domaći čovik lipo šal na godišnji kako čovik. I bil bi domaći turist. (Njih van skoro više i ni). Do nikoga doba smo se busali va prsa kako je domaćih tuliko i tuliko (ma to je bilo još za vrime Jugoslavije pa su to potezali Slovenci, aš tada su i oni bili domaći). Sada, domaćih više skoro ni ni. A ča nismo rekli da je "domaće domaće" i da je "domaće najbolje" i da "budimo Kroativni"!?

Gospodo političari, gospodo menadžeri, gospodo marketinški magi, molin vas lipo začepite! Pokrijte se z ušimi. Hote malo Barke Fahren! Ližite malo guzice stranimi turistimi. Domaći ćedu i ovoga i ki zna koliko još let stat doma i sanjat more.

Hvala vami.

Ala bog. Gren ća, aš bin mogla još komu god prpeljat kakovu god duševnu bol, a ondat bin nahebala kako žuta. Aš nisan ja Vedrana Rudan pa da moren beštimat okolo i kljet, a da misle kako je to simpatično, aš je domaće!

Meni su vero za vraga dali švabsko ime!