Ćo ma pasa leto dan! Kako da san čera pisala pismo kumpanjici Mariji … a ovo je već opet vrime od Adventa, ča bi reć vrime sprid Božića. Ben lipa san! I ja i svi ki su mi doma. Ovo je vrime kad se kupuju čestitke, dari, ukrasi za božićne drvca – pardon; ovo je vrime va komu smo to nikada kupovali.

Danaska nan govore da neka stisnemo kajiš.

Ki kajiš?? Onaj od kad san hodila va osnovnu školu? Onaj koga su mi poručevali Mika Špiljak i njegova kumpanija da moran stiskat? Dumišljate se vi te kumpanije? Oni su nan bili udelali i raspored ki dan će ki od nas butande nosit! Sve je imelo raspored.

Danaska više ni ni rasporedi. Samo da neka stisnemo kajiš!

Ben, da malo pogjedan kadi bin ja to mogla stisnut kajiš za opću dobrobit ove moje lipe domovine …

Po kući hodin obučena kako medvid, aš se grijen na struju – a struja je skupa. Znela san sve žarulje zi plafona i pušćala samo dvi tako da se po kući išćemo z lampadinu, a maške su nan sila vesele aš je noć kod mene doma jako duga.

Frižider mi je prazan. Nutri je mliko, par jaj i Margo (aš Margo mora bit tako su rekli na televiziju). I još jiman i črnoga kruha. To van je zato aš kad god govore da će neš pojeftinit onda se ćapaju za mliko, kruh i za ulje. Kako da moremo živit od kruha, mlika i ulja.

To je temelj zdrave prehrane! Narižeš staroga kruha, umočiš ga va jaje i hitiš pohat va parsuru punu ulja. Recept za preživit svaku krizu! Ma taj jako deblja – a ča ćemo onda z onin kajišon???

Ja volin pisat. Zato iman Internet. Kompjuter smo kupili prvo nego je počela kriza. Čovik je društveno biće pa mora imit kumpaniju. Kakovu ši da ši, ma mora ju imit. Ja san zračunala da mi je kumpanija na internetu jeftinija nego da mi svaki dan hode doma. Kad bi mi svaki dan hodili doma morala bin njin kuhat kafe, kupit pivu, kakovu god slatkecu. Niman ja šoldi za to! I tako, hitili smo ključ va bravu i živimo samo onlajn.

Lipo platin račun za internet jedanput na misec i celo vrime san va kumpaniji. Ne moran mislit ni ko san počešljana, ni našminkana ni kako san obučena. Tar me niki ne vidi!

Ben to smo razjasnili. I da mi ne bi ki sad rekal da san škrta Bodulka! Ovdi van ljudi plaćaju miris mora i za gnjilu bananu; a mi jako volimo banane – ne znan to je valjda neč genetski ...

I to vero mi ki smo ovuda po celo leto! Naši pomidori plaćaju mostarine i cestarine i pogled na more. Zato su to najskuplji pomidori na svitu. I tako je vero zi svačin. Dobro, ala ni vero zi svačin: kruh, mliko i ulje nimaju pogled na more i ne plaćaju mostarinu. Oni su više humanitarno nastrojeni – aš ko ne bimo krepali!

I tako van to gre z dana u dan. Ljudi sve manje imaju. Boje se bolesti kako vraga, srame se praznih frižideri i vesele se Božiću i Novomu letu. Kako munjeni!

Čestitke će poslat emajlon aš za tuliko poštanskih marak se ne bi našlo šoldi. Ko šalješ čestike z poštu neće ti ostat za kupit par deki orihi za zmutit kakov obični biskvit i hitit va njega par mrvic od oriha.

A onimi na televiziju još ni dosta pak još jače kriče da neka stisnemo kajiši!

Ma znate ča lipi moji ljudi z televizije. Ja san se stavila va brageše na laštik.Niman kajiša. A da ne bite mislili kako se sad moren rastezat kuliko mi se oće, reć ću van još i ovo: Brageše su one iste ke je moj sin prerastal.

I koga va ovoj zemlji mora bit sram!??

Srićan van Božić i Novo leto!