Miljenko Smoje (FOTO: uafdu.hr)

Od ciloga kalendara najdraža su mi tri datuma - tri za me velike i mile fešte - Prvi maja, sveti Duje i Badnji dan. Najlipši su bili Prvi maja moga ditinjstva, i to kad bi fešta bila zabranjena, stizala su u Split pojačanja policije i đendari, na kontrolna mista postavjali bi se i gevermašine i vojska bi znala izać na ulice sa bajoneton na pušku a radnici u veštite, sa crvenin kularinon isto su se okupjali na Rivu. A di su povorke, crvene bandire, pisma "u divjaka luk i strela, želježnica selo i grad...", pa parola kruva i rada - pa onda u prirodu zavrtit janjca na ražanj...

U socijalizmu kad je svak mora odit u povorku, Prvi maja je izgubija svaki šušt i gušt. Svetoga Duju ne triba ni spominjat. Fjera nad fjeran, na svitu nije bilo take. Ali kako i zašto san se ja, koji san u ditinjstvu još izgubija našu svetu viru, kako san se ja zalipija za Badnji dan? Čin počne jesen, ja omar računan koliko je još dan do Badnjega dana. Pri desetak godin u Zagrebu smo snimali Velo misto i mora san cilu zimu gori ostat. Pisa san u foje kako ću gori učinit svece i dočekat Novu i lipo ću sa otelske ponistre gledat kako snig pada po Tuškancu, ali bakalarski štimung dopra je do moje sobe, ćutija san vonj bakalara i prvon feraton uteka san doma. U otelu san ostavija i kufer i makinjetu i libre koje san donija i nove koje san u antikvarijat kupija.

Bakalar (FOTO: neretvanskanostalgija.blogspot.com)

"Bilo je i u Zagreb bakalara, jili smo ga i u restoran "Korčula" i u gostionicu "Pula" ali nije to to. Nije isto bakalar u Split i bakalar u Zagreb! U ferati san razmišlja ča to jema u tome šporkome bakalaru pa me tako vuče i pritiže? Poludija bi da na Badnji dan ne izin pijatić bakalara. Samo su me jedne godine zajebali komuništi, kad su kurbini sinovi, povukli bakalar, sakrili ga i pustili u prodaju tek za novu godinu. Koje su oni narodu dišpete činili, na muke ga stavjali? Kud ćeš surovijega dišpeta i gore torture nego prid Badnji dan sakrit bakalar? A sićan se kad su omar posli rata študentima u menzan na Badnji dan davali mesa koliko oćeš? I otad ja san se zakleja da mi nikad, nikad na Badnji dan neće uzmanjkat bakalar. Uvik mi je bar jedan bija u kući. I ne bi ga izija, dok ne bi dobavija drugoga. Uvik je jedan bakalar u kuću čeka Badnji dan. A onda je dotur Žagar u Trstu preuzeja obavezu da mene i pokojnoga mi prijateja Šanta opskrbljava bakalaron. I tek kad mi je nikidan stiga iz Trsta bakalar, izija san oni koji je čeka. I kad bi u Splitu nestalo bakalara, ko god me poznaje, svak je od mene tražija da mu dan bar desetak deki. Svojta, susidi, prijateji, svi bi bakalar tražili.

- A ko će mi dat bakalara?

- Bija si u Trst.

- Ali kad san bija, pri dva miseca.

- Bit će tebi osta koji bakalarić?

Javjali bi se i oni koji su u Trst bili posli mene. Jidija bi se:

- A ča niste kupili bakalara kad ste bili vanka?

- Jesmo kupili smo.

- I di van je?

- Bome izili!

- Vraga proždrli, mogli ste ga čuvat ka i ja.

Botu san se smilova starome prijateju i od svoga mu odnija deboto polak. Poludija je.

- Pa je li dilo ovo čoviku donit? Repicu! Pari repica od zelembača.

Veli Varoš - Split (FOTO: narodni.net)

Kad god razmišljan o bakalaru vidin kužinu naše stare kuće u Velome Varošu i za stolon sve moje pokojnike - mater, oca, tetu Tonu. Za obid je uvik bija bakalar a za večeru slana srdela, kavol na uje, frigana anguja i mali barbuni. I kad san posli jema pinez, kad san moga jist velike barbune, želija san take iste male. Kavol mi ni drag, anguja pogotovo, ali te večeri ja san slako i kavol i anguju jija. Zaželin lipo blagovat sa velikon kandelon nasrid stola zabodenon u šenicu i poza večere pit vino i vodit lipe, šesne, pametne razgovore. Kad je bija u veliku modu dobri papa Đovani, moja teta je pitala:

- Bože moj, da mi je znat ča Đovani najviše voli jist?

- Bakalara, lud je za bakalaron - izmislija san ti čas.

- E pizda je Đovani, ne zna on ča je lipo.

I ja bi falija dobroga papu koji svima radnicima kad mu dojdu u vrtal radit da po litru vina po obroku. I to vina iz svoga podruma. Teti bi i suze potekle.

- Dobroga li čovika, Gospe moja!

A ča je najsmišnije ta moja teta bila je, kako je ona govorila, žestoka komuništovica.

Za Badnji dan mora bit i pravo vrime. Ne smi bit bilo kakvo vrime. Ako je vedro, sija sunce, svitlost smeta, oči suzidu, onda ništa ne vridi. Sve mi prisede. Ti dan i sutradan isto, nebo mora bit sivo, oblačno meko i judi da govoridu: ovo je vrime od sniga, zove snig priko mora.

I sad ja i ona izimo pijatić bakalara, popijemo botiljicu crnoga i srce ti je puno. I suze teču od milinja. I za vrime najžešćega mraka zna san telefonski zvat druga Baju. Oćeš li kompanjo da ti pošajen bakalara?

- A ča ti šjora pizdo misliš da ga u mene nima. Ajde dojdi, još koga dovedi. Jema ga dva bronzina.

- A fritul?

- Evo ji, još ji friga. Trči dok su teple!

Pri večere zna san sa pokojnin likaron Vidovićen, sinon velikog slikara, prošetat kaletan Veloga Varoša. Iz svake kuće dopira je miris bakalara, uz ponistre vidili su se bori, u potleušican na stole bile tavaje. Svuda su se frigale fritule. On bi sta.

- Čujete li? Nije jon dobro uje. Malo je upaljeno. A nima gore stvari i za bakalar i za fritule od upaljenoga uja. Sve će in bidnima progorčat.

ČA MI SE RUTAJE

Pri, u staro vrime, bakalar se jija priko cile godine. Tek je zanji decenij on posta skupa gospodska spiza. Pri drugog svjetskoga rata na peškariji si svaki dan moga kupit već namočeni i istučeni bakalar. Prodava se ka i svaka druga riba. Čak i po butigan se od petka kupova namočeni bakalar. I ja mislin da ga se nidir na svitu nije jilo više nego u Dalmaciji. Jila ga je cila Dalmacija, i boduli i Vlaji. Kad san bižingava po starin librima naša san jedan puno lipi, dragocjeni podatak. Tamo, daleke godine Gospodnje 1910. zastupnici u Dalmatinskome saboru u Zadru predlagali su da se u Dalmaciji formira posebna parabrodarska kompanija koja će se bavit direktnin uvozon bakalara iz Norveške. A onda su pisali ne bakalar nego bakaljar. I posebni vapor su za tu svrhu planirali kupit. Morete zamislit koliko je gladna Dalmacija gucala tega bakalara!

I otad pisma: Ča mi se rutaje / Ji san bakalara / Ča mi se rutaje, Bakalar na uje!

Stari Split (FOTO: skyscrapercity.com)

I još onda za vrime Auštrije, vas škart, sva bofl roba koja se uvozila iz Trsta zvala se "bakalar za Dalmaciju". Čak je i jedna kazališna družina iz Zagreba kad je gostovala u Split (a predstave su jon bile slabo opremljene) napadnuta u novine pod naslovom "Bakalar za Dalmaciju". A znate li da je ona ispočetka, pri godin, znala na me vikat kad bi se ruta poza bakalara. Ona nije ni znala da je to najveći kompliment domaćici. A moja pokojna mater bila bi sritna. Rekla bi: Ola ča si se lipo ruta! Slako si izija. Guštala san te gledat kako jiš! A ča ću riči trošit? Ovi današnji nesriknji svit, ne zna ništa. Ni o čemu pojma nima.

BLAGO SIROMAJIMA

I evo nan je doša Badnji dan. I vrime ugodilo. Metereolozi su najavili orkansko jugo ali srićon su falili, mirno je, tijo, fino, meko oblačno. I sve je na svoje misto - kako Bog zapovida. Ne znan je li se u istoriju grada ikad izilo ovoliko bakalara. Svaka kuća skuvala je bakalar. Za siromaje koji nimadu pinez bakalar se dili po restoranima. I neka ko još dojde prigovarat da ova naša nova država ne vodi konta o siromajima.

A bakalar se sirotinji dili i to ne na kazan nego ji kamarjeri ka gospodu služidu. Ne znan ča je sa vinon. Bakalar mora plivat u vinu. Ako in bar po litre po glavi ne daju, sve će sirotinji progorčat.

Da je najžešća magla, noćina, crna tmica, da ni jedna letrika ne gori, da ni jedna lanterna ne radi lako bi bilo pronać Split. Po vonju od bakalara. Danas je Badnji dan, čeka me bakalar za obid i večeru, a već san ga štuf. Susida mi je uranila, skuvala ga je jučer jer da danas neće jemat vrimena i donila me duboki pijat. Polak san ga izija za obid, polak za večeru a sad me toka opet sve iznova. A umoran san, noge i ruke me od truda bolidu. Četiri puta san pod tereton učinija po osandeset skal. Nosija san iz butige vino i mineralnu vodu. Prijateji mi dolazidu na obid i večeru i ne smi falit. Nikor u moju kuću ne smi ostat žedan.

(FOTO: seoski-turizam.net)

Asti boga! Evo se jopet vraća jedna socijalistička situacija. U osan uri ujutru bija san u butigu a kruva nima. Tražija san još u dvi butige. Nima, nestalo, razgrabili su ga. A dva dana će butige bit zatvorene - za Božić i sv. Stipana. Misto trkat i tražit po gradu, telefonira san prijatejima: svak neka donese za se kruv.

A znate li štioci, da još jema po Splitu žen koje ne znadu pripremit bakalar? Domaćica, a bakalar ne zna skuvat! A eto ne zna! Gospe moja, koja je to injoranca, nebriga, podcjenjivanje muža, famije... Prijateju, koji jema ti slučaj, otvoreno san reka:

- A šta čekaš, šta se ne rastaviš?

- Pa za to?

- E, za to!

Da te privari moš jon oprostit, ali ako brujet ne zna učinit ako ne zna fritule pofrigat ni kroštule a šta jemaš čekat. Oli je šupiraj nazad u matere, pa neka se vrati kad nauči. I ja mislin da nima pametnoga suca koji ti u parnici za razvod braka ne bi da prav.

Ona je došla sa pazara i pripovida mi da jema svega. Ma baš svega, isto ka u mirno vrime. Jema pršuti, pancete, suđuki, kobasic, krvavic, pečenice, pulastri, tuk, pivac... A došla je deboto prazni ruk, samo sa bokun janjčića u kartol.

- Mogla si bar jednu tučicu kupit.

- Nima mali. Jema veli od deset - petnajst kili.

- A kako ji nosidu? Je li u karijoli oli na kosti?

Sitija san se! U Srbiji je glad, na televiziju san gleda kako ni u Novi Sad nima kruva. I sad kad je božićnje primirje, kad ne pucadu kaluni, naše dušmane najučinkovitije ćemo bombardirat kad bi ji se obasulo sa kartolinan i fotografijan naši pazari i tržnica punima svake gracje božje. Neka jin gre voda na justa, neka skroz popizdidu.

I BOGU SE ZGADILO

Sveta noć nije mirna ni tiha. Najpri je pridvečer zapuvalo jugo pa bacilo na lebićadu. Urla vanka vitar i nabrekla mi vrata, koja od sobe vodu na teracu, svaki čas rastvara. Zaludu se borin. Čin ji zatvorin udarci lebićade ji rastvaraju. A lani i je marangun popravija. A kad je ferma vitar, počeli su triskat gromi, nebo se rastvorilo. Bidan svit koji se sprema na ponoćku. Ko je iša po takome povodnju svi bi mu griji morali bit oprošteni.

Puna me sinoć bila kuća svita, došlo je više gostiju nego jeman katrigi. Blagovali smo, ćakulali, pivali, televizor nismo ni otvarali. I tek ujutru slušan talijanske visti. Kaluni, ofenzive, bombardiranja, mrtvi, ranjeni... Nu ti boga a di se to sad tuču jer u nas je božićno primirje? Bosna, Sarajevo, Mostar. Ajme Gospe, onda je ovo u nas. Primirje nije trajalo njanci minut, njanci sekundu. I na sveti dan kojemo se gore no ikad. Slaje no ikad. Koja je ovo štirpa svita! Molimo se za mir, klecamo, na kolina padamo, tučemo čelon o mramor, molimo skrušeno, zazivjemo Boga, Isukrsta, Divicu Mariju, poglavari nan i primirje dogovore i cili svit je malo odanuja di neće kad je ipak, ipak postignut bar ti napredak, ka znak dobre voje.

Bog će se smilovat, Bog će nan svima pamet prosvitlit. Je malo morgen! Jema bit da smo se i Bogu i Alahu zgadili. Diga je Bog ruke od svi nas. Ne vodi konta o nan. Nije ni Bogu lako sa ludin narodima. Nije Bog pristran ne moš ga ničin potkupit, obrlatit, privarit. Nije on na ničijoj strani, ni na našoj, ni na strani naši dušmani. Toliko je otrova i mržnje u nama da bi se cilo nebo zatrovalo. I kako smo se uputili, klat ćemo se do zadnjega. Je li ovo najsuroviji, najkrvaviji Božić u ciloj istoriji krvavog Balkana?

Smoje i njegov Šarko

I moj stari pametni kompanjo, moj Šarko, se ove dane izbezumija. Oko kuće se neprestano čuje pucnjava, petarde, tondini, rokete i di koji šaržer. I na svaki pucanj on laje, reži. Jer on bi tija mirno spavat. Interesantno, kad tuču gromi, ne laje. Gromi mu ne smetaju, a je li pukne, omar se jidi, brontulaje, reži, laje. Tija bi reć: koji van je kurac pa i u dane koji su van sveti najžešće pucate!

Opet orkansko jugo. Malo se smirilo pa još žešće navalilo. I vitri su poludili. Nima više meštralići, burini, južini. I oni su se pritvorili u monstrume, u meštralune, buretine i južetine. A pošćeri još nisu donili penšjune. Ni za Božić ni za Novu. Oli državi nije sve isto dat penšjune tri dana pri oli posli? Jema bit da ćedu nan penšjune dilit jušto tako da moremo proslavit pravoslavni Božić i pravoslavnu novu godinu.

Miljenko Smoje (Feral Tribune, 4. siječanj 1994.)

Lupiga.Com

Naslovna fotografija: Novilist.hr